Читать онлайн «Библия (на цсл. гражданским шрифтом)». Страница 185

6 яко истязал еси беззаконие мое и грехи моя изследил еси.

7 Веси бо, яко не нечествовах: но кто есть изимаяй из руку твоею?

8 Руце твои сотвористе мя и создасте мя: потом же преложив, поразил мя еси.

9 Помяни, яко брение мя создал еси, в землю же паки возвращаеши мя.

10 Или не якоже млеко измелзил мя еси, усырил же мя еси равно сыру?

11 Кожею же и плотию мя облекл еси, костьми же и жилами сшил мя еси:

12 живот же и милость положил еси у мене, посещение же твое сохрани мой дух.

13 Сия имеяй в тебе, вем, яко вся можеши, и невозможно тебе ничтоже.

14 Аще бо согрешу, храниши мя, от беззакония же не безвинна мя сотворил еси.

15 Аще бо нечестив буду, люте мне, аще же буду праведен, не могу возникнути: исполнен бо есмь безчестия,

16 ловимь бо есмь аки лев на убиение: паки же преложив, люте убиваеши мя.

17 Обновляяй на мя испытание мое, гнева бо великаго на мя употребил еси и навел еси на мя искушения.

18 Почто убо мя из чрева извел еси, и не умрох, око же мене не видело бы,

19 и бых бы аки не был? почто убо из чрева во гроб не снидох?

20 или не мало есть время жизни моея? остави мене почити мало,

21 прежде даже отиду, отнюдуже не возвращуся, в землю темну и мрачну,

22 в землю тмы вечныя, идеже несть света, ниже видети живота человеческаго.

1 Отвещав же софар минейский, рече:

2 глаголяй много, и противоуслышит: или многоречив мнится быти праведен? благословен рожденный от жены малолетен.

3 Не мног во словесех буди: несть бо противовещаяй ти.

4 Не глаголи бо, яко чист есмь делы и безпорочен пред ним:

5 но како Господь возглаголет к тебе и отверзет устне свои с тобою?

6 Потом возвестит ти силу премудрости, яко сугуб будет в сих, яже противу тебе: и тогда уразумееши, яко достойная тебе сбышася от Господа, имиже согрешил еси,

7 Или след Господень обрящеши? или в последняя достигл еси, яже сотвори вседержитель?

8 Высоко небо, и что сотвориши? глубочае же сущих во аде что веси?

9 не должае ли меры земныя, или широты морския?

10 Аще же превратит вся, кто речет ему: что сотворил еси?

11 Той бо весть дела беззаконных: видев же нелепая, не презрит.

12 Человек же инако обилует словесы: земный же рожденный от жены равен ослу пустынному.

13 Аще бо ты чисто положил еси сердце твое, воздеваеши же руце твои к нему,

14 аще беззаконно что есть в руку твоею, далече сотвори е от тебе, неправда же в жилищи твоем да не вселится:

15 тако бо ти возсияет лице, якоже вода чиста: совлечешися же скверны, и не убоишися,

16 и труда забудеши, якоже волны мимошедшия, и не устрашишися.

17 Молитва же твоя, аки денница, и паче полудне возсияет ти жизнь:

18 уповая же будеши, яко будет ти надежда: от туги же и попечения явится ти мир:

19 упокоишися бо, и не будет боряй тя: пременяющиися же мнози имут просити тя,

20 спасение же оставит их: надежда бо их пагуба, очи же нечестивых истают.

1 Отвещав же иов, рече:

2 убо вы ли едини есте человецы, или с вами скончается премудрость?

3 И у мене сердце есть якоже и у вас.

4 Праведен бо муж и непорочен бысть в поругание:

5 во время бо определеное уготован бысть пасти от иных, домы же его опустошены быти беззаконными. обаче никтоже да уповает, лукав сый, неповинен быти,

6 елицы разгневляют Господа, аки и истязания им не будет.

7 Но вопроси четвероногих, аще ти рекут, и птиц небесных, аще ти возвестят:

8 повеждь земли, аще ти скажет, и исповедят ти рыбы морския.

9 Кто убо не разуме во всех сих, яко рука Господня сотвори сия?

10 Не в руце ли его душа всех живущих и дух всякаго человека?

11 Ухо бо словеса разсуждает, гортань же брашна вкушает.

12 Во мнозем времени премудрость, во мнозе же житии ведение.

13 У него премудрость и сила, у того совет и разум.

14 Аще низложит, кто созиждет? аще затворит от человеков, кто отверзет?

15 Аще возбранит воду, изсушит землю: аще же пустит, погубит ю превратив.

16 У него держава и крепость, у того ведение и разум.

17 Проводяй советники пленены, судии же земли ужаси:

18 посаждаяй цари на престолех и обвязуяй поясом чресла их:

19 отпущаяй жерцы пленники, сильных же земли низврати:

20 изменяяй устне верных, разум же старцев уразуме:

21 изливаяй безчестие на князи, смиренныя же изцели:

22 открываяй глубокая от тмы, изведе же на свет сень смертную:

23 прельщаяй языки и погубляяй их, низлагаяй языки и наставляяй их:

24 изменяяй сердца князей земных, прельсти же их на пути, егоже не ведяху,

25 да осяжут тму, а не свет, да заблудят же яко пияный.

1 Се, сия виде око мое, и слыша ухо мое,

2 и вем, елика и вы весте: и не неразумнее есмь вас.

3 Но обаче и аз ко Господу возглаголю, обличу же пред ним, аще восхощет.

4 Вы бо есте врачеве неправеднии и целителе злых вси,

5 буди же вам онемети, и сбудется вам в премудрость.

6 Слышите же обличение уст моих, суду же устен моих вонмите.

7 Не пред Богом ли глаголете и пред ним вещаете лесть?

8 или уклонитеся, вы же сами судии будите.

9 Добро бо, аще изследит вас: аще бо вси творящии приложитеся к нему, обаче обличит вы.

10 Аще же и тай лицам удивитеся,

11 не движение ли его смятет вас, боязнь же от него нападет на вы?

12 Отидет же величание ваше равно пепелу, тело же бренно.

13 Умолчите, да возглаголю и почию от гнева.

14 Вземля плоти моя зубами, душу же мою положу в руце моей.

15 Аще мя убиет сильный, понеже и нача, обаче возглаголю и обличу пред ним:

16 и сие ми сбудется во спасение: не внидет бо пред ним лесть.

17 Послушайте, послушайте глагол моих: возвещу бо вам слышащым.

18 Се, аз близ есмь суда моего, вем аз, яко праведен явлюся.

19 Кто бо есть судяйся со мною, да ныне умолчу и изчезну?

20 Двое же ми сотвориши, тогда от лица твоего не скрыюся:

21 руку от мене отими, страх же твой да не ужасает мя:

22 посем призовеши, аз же тя послушаю, или возглаголеши, аз же ти дам ответ.

23 Колицы суть греси мои и беззакония моя? научи мя, кая суть?

24 Почто крыешися от мене? мниши же мя противна суща тебе?

25 Или яко лист движимь ветром убоишися? или яко сену носиму ветром противляешимися?

26 Яко написал еси на мя злая, обложил же ми еси юностныя грехи:

27 положил же еси ногу мою в возбранение: сохранил же еси дела моя вся: в корения же ног моих пришел еси:

28 иже обетшают якоже мех, или якоже риза молием изядена.

1 Человек бо рожден от жены малолетен и исполнь гнева:

2 или якоже цвет процветый отпаде, отбеже же яко сень, и не постоит.

3 Не и о сем ли слово сотворил еси, и сему сотворил еси внити на суд пред тя?

4 Кто бо чист будет от скверны? никтоже,

5 аще и един день житие его на земли: изочтени же месяцы его от тебе, на время положил еси, и не преступит.

6 Отступи от него, да умолкнет и изберет житие якоже наемник.

7 Есть бо древу надежда: аще бо посечено будет, паки процветет, и леторасль его не оскудеет:

8 аще бо состареется в земли корень его, на камени же скончается стебло его,

9 от вони воды процветет, сотворит же жатву, якоже новосажденное.

10 Муж же умерый отиде, пад же человек, ктому несть.

11 Временем бо оскудевает море, река же опустевши изсше:

12 человек же уснув не востанет, дондеже не будет небо сошвено, и не возбудятся от сна своего.

13 Убо, о, дабы во аде мя сохранил еси, скрыл же мя бы еси, дондеже престанет гнев твой, и вчиниши ми время, в неже память сотвориши ми.

14 Аще бо умрет человек, жив будет: скончав дни жития своего, потерплю, дондеже паки буду.

15 Посем воззовеши, аз же послушаю тя: дел же руку твоею не отвращайся:

16 изчислил же еси начинания моя, и ничтоже тя мимоидет от грех моих:

17 запечатлел же ми еси беззакония в мешце, назнаменал же еси, аще что неволею преступих.

18 Обаче и гора падающи распадется, и камень обетшает от места своего:

19 камение огладиша воды, и потопиша воды взнак холмы земныя, и ожидание человеческо погубил еси.

20 Отринул еси его до конца, и отиде: изменил еси ему лице и испустил еси.

21 Многим же бывшым сыном его, не весть: аще же и мало их будет, не знает:

22 но плоти его болеша, душа же его о себе сетова.

1 Отвещав же елифаз феманитин, рече:

2 еда премудрый даст ответ разумен на ветр, и наполни болезнию чрево,

3 обличая глаголы, имиже не подобает, и словесы, ихже ни кая польза?

4 Не и ты ли отринул еси страх? скончал же еси глаголы таковы пред Господем?